ករណីប៉ុនប៉ងឃាតកម្មដោយប្រើអាវុធកែច្នៃដើម្បីសម្លាប់អ្នកកាសែតចោលបំបិទមាត់ នៅសៀមរាបដោយមានការយកចិត្តទុកដាក់ជាប្រចាំពីសំណាក់លោកស្នងការនគរបាលខេត្តសៀមរាបឥឡូវចាប់ខ្លួនជនដៃដល់បានហើយ...!
ជនសង្ស័យបានប្រើកាំភ្លើងឆ្នុក បាញ់ទៅលើជនរងគ្រោះឈ្មោះ ឈឿង ឈឹង ភេទប្រុស អាយុ ៦៣ ឆ្នាំ ដែលជាអ្នកយកព័ត៌មាន កម្ពុជាអភិវឌ្ឍន៍ បណ្តាលឲ្យរងរបួសធ្ងន់ត្រង់ចំហៀងខាងឆ្វេងទៅដល់ខាងស្តាំ (ដោយបៀមគ្រាប់ជាប់)។
ជនសង្ស័យសារភាពថា ករណីនេះមានមូលហេតុដោយសារជនរងគ្រោះបានទារប្រាក់ជាបន្ដបន្ទាប់ ខណៈដែលជនសង្ស័យមិនអាចបង់ប្រាក់បាន។ កំហឹងនេះបានជំរុញឲ្យជនសង្ស័យធ្វើសកម្មភាពបាញ់ដើម្បីឲ្យជនរងគ្រោះឈប់ដើរទារប្រាក់។
បន្ទាប់ពីទទួលព័ត៌មាន លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានចាត់ឱ្យកម្លាំងនគរបាល ដឹកនាំដោយមន្រ្តីជាន់ខ្ពស់ចុះដល់កន្លែងកើតហេតុ ដើម្បីធ្វើការស្រាវជ្រាវ និងស៊ើបអង្កេត។ ដោយសារបច្ចេកទេស និងការងារយុទ្ធសាស្រ្តល្អ សមត្ថកិច្ចបានកំណត់អត្តសញ្ញាណ និងចាប់ខ្លួនជនសង្ស័យបាននៅថ្ងៃទី ០៥ ខែធ្នូ ឆ្នាំ ២០២៤។
វត្ថុតាងដែលដកហូតបាន៖
- គោយន្តកន្ត្រៃ ១
- កាំភ្លើងឆ្នុក ១
- កាណុងសេកាសេ ១
- កូនកាំបិត ១
- គ្រាប់កាំកុង ៦៤ គ្រាប់
- សំបកគ្រាប់កាំភ្លើង ៦២ គ្រាប់
- កូនសោលេខ ១០ ចំនួន ២
- កាបូបស្ពាយ ១ និងរំសេវកន្លះដប។
