រាជរដ្ឋាភិបាលអំពាវនាវអោយគ្រប់មជ្ឈដ្ឋានគាំទ្រសកម្មភាពចលនាភូមិ១ ផលិតផល១
ទន្ទឹមនេះសម្តេចមហាបវរធិបតីក៏បានអំពាវនាវដល់ក្រសួង ស្ថាប័ន ជាសមាជិកគណៈកម្មាធិការជាតិ ជំរុញចលនាភូមិមួយផលិតផលមួយទាំងអស់ ទាញយកសកម្មភាពគន្លឹះពាក់ព័ន្ធនឹងការទទួលខុស ត្រូវរបស់ខ្លួន កសាងលម្អិត និងបញ្ជៀបចូលក្នុងផែនការ យុទ្ធសាស្ត្ររបស់ក្រសួង ស្ថាប័នខ្លួន ឱ្យមានប្រសិទ្ធភាពខ្ពស់ និងស្របទៅតាមស្មារតីគណនេយ្យភាពសមិទ្ធកម្ម។
ការអំពាវនាវនេះ បានធ្វើឡើងនៅក្នុងនៅក្នុងសារលិខិតថ្ងៃទី២៦កុម្ភ: គាំទ្រការអនុវត្តយុទ្ធសាស្ត្រជាតិស្តីពី ការជំរុញចលនាភូមិមួយផលិតផលមួយ ៥ឆ្នាំ លើកទី២ (ឆ្នាំ២០២៤ - ២០២៨)ដោយសម្តេចមហាបវរធិបតីបានបង្ហាញអោយឃើញនូវ តួនាទីឱ្យកាន់តែសកម្មថែមទៀត របស់ចលនាភូមិមួយផលិតផលមួយ តាមរយៈការកៀរគរប្រជាជនឱ្យខិតខំផលិត កែច្នៃ ប្រើប្រាស់ឱ្យអស់លទ្ធភាព និងប្រកបដោយនិរន្តរភាពនូវធនធានសក្តានុពលទាំងឡាយរបស់មូលដ្ឋាន ដើម្បីបង្កើតឡើងនូវផលិតផល សម្បូរបែប និងមានប្រៀបឈ្នះក្នុងការប្រកួតប្រជែងជាមួយផលិតផលបរទេស។
សូមរំលឹកថា ការជំរុញចលនាភូមិមួយផលិតផលមួយបានធ្វើឡើងបន្ទាប់ពីសង្កេតឃើញថា សមត្ថភាពកែច្នៃចេញជាផលិតផលសម្រេចរបស់យើងនៅមានកម្រឹត។ ស្របពេលជាមួយគ្នានេះ ផលិតផលមួយចំនួនធំ គុណភាពនៅមានកម្រិត ការវេចខ្ចប់នៅមិនទាន់បានត្រឹមត្រូវល្អ តម្លៃនៅខ្ពស់ ធ្វើឲ្យពិបាកក្នុងការប្រកួតប្រជែងលើទីផ្សារសេរី។
យោងតាម គោលនយោបាយផលិតផលភូមិមួយ ផលិតផលមួយ បានបញ្ជាក់ថា ផលិតផលភូមិមួយ ផលិតផលមួយ គឺជាផលិតផលដែលផលិតឡើងដោយប្រជាជន តាមភូមិឋានមួយឬច្រើន ហើយផលិតផលទាំងនោះឆ្លុះបញ្ចាំងពីលក្ខណៈវប្បធម៌ប្រពៃណីតាមបែប បុរាណនិងតាមបែបសម័យទំនើប ដែលផ្តល់នូវកិត្យានុភាពនិងមោទនភាពចំពោះភូមិឋានខ្លួនកំពុង រស់នៅ ហើយផលិតផលទាំងនោះមានសក្តានុពលអាចពង្រឹងនិងពង្រីកបានទាំងបរិមាណ គុណភាព និងសោភណភាពដើម្បីបង្កើនតម្លៃបន្ថែមក្នុងការជួយបង្កើនប្រាក់ចំណូលដល់ប្រជាជន ។
សូមបញ្ជាក់ថា ក្នុងរយៈពេលប៉ុន្មានឆ្នាំ ចុងក្រោយនេះ ការជំរុញចលនាភូមិមួយផលិតផលមួយ សម្រេចបានលទ្ធផលយ៉ាងល្អប្រសើរ ដែលនាំទៅដល់ ការប្រែប្រួលជាវិជ្ជមាននៃផលិតផលខ្មែរ ដូចជាគុណភាព ស្តង់ដាអនាម័យ ការវេចខ្ចប់ ជាពិសេសការដាក់ ស្លាកសញ្ញាសម្គាល់លើផលិតផលជា «ផលិតផលភូមិ១ផលិតផល១» ដែលមានចំនួន៥៥៩ ត្រឹមឆ្នាំ២០២៣ នៅ ទូទាំង២៥រាជធានី- ខេត្ត។ គិតត្រឹមឆ្នាំ២០២៤ មានមូលដ្ឋានផលិតចំនួន ៨៤៤ មកពី៦៤២ភូមិ នៃរាជធានី ខេត្តទាំង២៥ បានចូលរួមក្នុងចលនានេះ ហើយគណៈកម្មាធិការជាតិជំរុញ ចលនាភូមិមួយផលិតផលមួយក៏បានទទួលស្គាល់ផលិតផលចំនួន ៩៦១ មកពីភូមិទាំងនោះ ជាផលិតផល ភូមិមួយផលិតផលមួយ រួចរាល់ផងដែរ។
ចលនាភូមិ១ ផលិតផល១ គឺជាយន្តការដ៏មានប្រសិទ្ធភាពមួយ ក្នុងការលើកកម្ពស់ការអភិវឌ្ឍសេដ្ឋកិច្ចមូលដ្ឋាន បង្កើតការងារនៅនឹងកន្លែង កាត់បន្ថយចំណាកស្រុក កាត់បន្ថយភាពក្រីក្រដែលទាំងនេះ គឺជាមូលដ្ឋានចាំបាច់ ក្នុងការរួមចំណែកធ្វើឲ្យកម្ពុជា ឈានទៅសម្រេចបាននូវចក្ខុវិស័យ ប្រែក្លាយជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់ នៅឆ្នាំ២០៥០។
ឈរលើស្មារតីលើកកម្ពស់ការប្រើប្រាស់ផលិតផលខ្មែរ ឱ្យកាន់តែទូលំទូលាយនិង ផុលផុស រាជរដ្ឋាភិបាលកម្ពុជាបានប្រគល់ភារកិច្ចជូនគណៈកម្មាធិការជាតិជំរុញចលនាភូមិមួយផលិតផលមួយ រៀបចំទិវាជាតិលើកកម្ពស់ការប្រើប្រាស់ផលិតផលខ្មែរ ថ្ងៃទី៩មេសា ជារៀងរាល់ឆ្នាំ៕
អត្ថបទ៖ ពេជ ប៊ុនរ៉ា អេបក្រសួងព័ត៌មាន (MoINFO APP)
ផ្សាយនៅថ្ងៃទី០១ ខែមីនា ឆ្នាំ២០២៥
ប្រភពពី៖ ក្រសួងព័ត៌មាន
ផ្សាយដោយ៖ នាគ.២៤
