កម្ពុជា និងទូតអូស្រ្តាលី ជួបពិភាក្សាលើការសហការ ពាក់ព័ន្ធគម្រោងសក្តានុពលថ្មីៗ ជាមួយក្រសួងធនធានទឹក និងឧតុនិយម
ក្នុងកិច្ចជំនួប ឯកឧត្តមរដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះគណៈប្រតិភូស្ថានទូតអូស្រ្តាលី និងបានថ្លែងអំណរគុណចំពោះរាជរដ្ឋាភិបាលអូស្ត្រាលី ដែលបានជួយគាំទ្រដល់ការកសាង និងអភិវឌ្ឍន៍សេដ្ឋកិច្ចកម្ពុជា ឱ្យមានការរីកចម្រើនជាបន្តបន្ទាប់ ជាពិសេសសម្រាប់វិស័យធនធានទឹក តាមរយៈគម្រោងកម្មវិធីខ្សែច្រវ៉ាក់តម្លៃកសិកម្មកម្ពុជា (កាវ៉ាក់១ និងកាវ៉ាក់២) និងការសិក្សាសមិទ្ធិលទ្ធភាពនៃគម្រោងធ្វើឱ្យប្រសើរឡើងសន្តិសុខទឹកកម្ពុជា ដែលមិនត្រឹមតែជួយកសាងប្រព័ន្ធធារាសាស្រ្តគ្រប់ជ្រុងជ្រោយ ដើម្បីជំរុញឱ្យប្រជាកសិករមានទឹកប្រើប្រាស់គ្រប់គ្រាន់សម្រាប់វិស័យកសិកម្មនៅក្នុងខេត្តគោលដៅ និងលើកស្ទួយកម្រិតជីវភាពប្រជាពលរដ្ឋឱ្យបានល្អប្រសើរប៉ុណ្ណោះទេ ប៉ុន្តែបានជួយជំរុញកំណើនសេដ្ឋកិច្ចជនបទឱ្យមានការរីកចម្រើនទ្វេដងផងដែរ។
នៅក្នុងកិច្ចជំនួបនេះដែរ ភាគីទាំងពីរ ក៏បានពិភាក្សាផ្លាស់ប្តូរមតិយោបល់ទៅវិញទៅមកអំពី ទី១)ឱកាសដើម្បីបន្តកិច្ចសហប្រតិបត្តិការរវាងប្រទេសទាំងពីរ រួមទាំងគម្រោងថ្មីៗដែលមានសក្តានុពលជាមួយក្រសួងធនធានទឹក និងឧតុនិយម ទី២)អភិបាលកិច្ចទឹក និងការអភិវឌ្ឍគោលនយោបាយសម្រាប់ធនធានទឹក និងឧតុនិយម ដោយសារអូស្ត្រាលីត្រូវបានទទួលស្គាល់ជាសកលសម្រាប់ការគ្រប់គ្រងធនធានទឹកចម្រុះ(IWRM) ទី៣)ការចែករំលែកចំណេះដឹង បទពិសោធន៍ និងការផ្លាស់ប្តូរបច្ចេកវិទ្យា និង ទី៤)វិស័យសំខាន់ៗនៃកិច្ចសហប្រតិបត្តិការដូចជា៖ ការវិនិយោគហេដ្ឋារចនាសម្ព័ន្ធក្នុងប្រព័ន្ធធារាសាស្ត្រពេញលេញ បច្ចេកទេសអភិរក្សទឹក និងប្រព័ន្ធធារាសាស្រ្ត និងភាពធន់នឹងអាកាសធាតុ និងការកាត់បន្ថយហានិភ័យគ្រោះមហន្តរាយ៕ ផ្សាយ៖ កន ចំណាន,
ប្រភព៖ ក្រសួងធនធានទឹក
ផ្សាយនៅថ្ងៃទី១៨ ខែកុម្ភៈ ឆ្នាំ២០២៥
ប្រភពពី៖ ក្រសួងព័ត៌មាន
ផ្សាយដោយ៖នាគ.២៤
